مواعيد الأكل

أصبح دلوقتى الشغل بياخد أكتر من تلات اربع اليوم وطبعا مش هاينفع الوقت دا كله نقضيه من غير ما نشحن الطاقه عن طريق الأكل

طيب ناكل امته وازاى وفين ومع مين وهل ينفع الأكل مع الشغل ولا مينفعش؟

فلنرى

فى انجلترا:ميحللهمش الأكل الا بالشوكه والسكينه بيستمتعه جدا بمناقشات العمل مع الأكل

فى اليابان:الشغل شغل والأكل أكل ووقت الأكل ده فرصه للتعارف والراحه مش بيجيبوا سيره الشغل نهائى

فى ألمانيا:يخلصوا حوارات الشغل الأول وبعدين يفضوا للأكل

فى ايطاليا:ياكلوا الأول وبعدين يفضوا لأى مناقشات تانيه

فى أمريكا:الفسات فود عندهم بياكلوه بسرعه وباديهم الاتنين مع عدم وجود اى محاوله لإيجاد اى حوار

شيماء

دليل المغتربين لفهم لهجات السكان المحلييين... الجزء الثامن

اليوم يا شباب.. الكلام هيكون عن الجمبري والطماطم أو القوطه:

أولا الجمبري....أولا ايه رايكم فيه ,انا عن نفسي مش بحبه ,جائز لاني مجربتش اكله وهجرب ليه...!! ده الكيلو سعره نااااار ههههه, ويمكن لما اكله هحبه وأمووت فيه ,بس بجد السبب اللي بيجعلني مش بحبه هو شكل الجمبري نفسه لكن

طعمه الله اعلم بيه لاني زي مقلتلكم مكلتوش قبل كده ,وطبعا بما ان فيه ناس بتحب تأكله يبقي تخلي بالها ان الجمبري في دول عربيه مسموش جمبري ,يعني مثلا في الخليج أسمه روبيان,

في سوريا أسمه "قريدس" في تونس أسمه "تريليه"
--------------------------------------------------------------------------

ندخل علي الطماطم...ومن هنا يا شباب حذار أن حد فيكم وهو في الشام ويطلب من البائع في السوق ويقله عاووز قوطه في تلك اللحظه هيبقي ذنبك علي جنبك وتستاهل اللي هيحصل فيك


ههههههههه,لان كلمة قوطه في اللهجه الشاميه كلمة أباحيه جدا جدا,أما الطماطم في اللهجه الشاميه فاسمها بندوره......يلا سلام

دليل المغتربين لفهم لهجات السكان المحليين :الجزء السابع ...لو سمحت ممكن "طحينة

عندنا في مصر عادي ممكن تدخل أي مطعم وتنده علي الجرسون وتقوله لو سمحت ممكن طحينه وفورا الجرسون

هيلبي طلبك ويحضر لك الطحينه وفرخه جنبها وشوية سلطة مع شوية خضروات وحاجة ساقعه جنبهم

وهتاكل وهتتبسط ,طيب يا عم ايه لازمة الكلام ده دلوقتي وخصوصا فيه ناس لسه جايه من الشغل

وعصافير بطنها بتصوص وممكن يدخلوا في خناقة مع زوجاتهم اللي مكسلين ومش مجهزين حاجه مهو طول الليل

فرجة علي المسلسلات والافلام والصبح نوم ولو مش عاجبه ده يروح عند امه هههه,يا عم بطل

خفة دم وادخل في الموضوع ,الموضوع بقي هيحكيه الاستاذ الكبير محمود عوض في كتابه بالعربي الجريح

اللي قال فيه وده نص كلامه "في مره كنا مجموعة أصدقاء عرب في مطعم في تونس .في البداية طلب

أحدنا من الجرسون طحينه .يعني سلاطة طحينه .

رمقه الجرسون شذرا ولم يرد .بعد قليل ناداه اخونا الكويتي من جديد وقال له معاتبا :يا اخي

طلبت منك سابقا طحينه ولم تأتي بها الان هات لنا طحينه ...وصمون.

عند هذا الحدقذف الجرسون بالفوطه من يده وصاح غاضبا بمجموع كلمات لا نفهم مفرداتهاولكننا

اجتهدنا لكي نفهمها بمضمونها .والمضمون هو أن الرجل يزمجر ويغضب لكرامته الجريحه والمهانه.وبعد

وساطة مصريه بين أخواننا في الكويت واخواننا في تونس طلعت العروبه بريئه .الحكايه ان "طحينة "في تونس لفظ من اختصاص شرطة الاداب وصمون لفظ من اختصاص سجون الاداب"

انتهي كلام الكاتب الكبير محمود عوض

يلا خلي بالكم من كلة طحينه لو حد راح تونس لان مش كل مره الجرسون هيقذف بالفوطه لا ده ممكن

يتهور ويستعمل يديه هههه ,يلا سلام

أصدقائى الأعزاء

أعتذر بشده عن التأخير دون تنويه أنا كويسه قوى الحمد لله أنا بس كنت مسافره والنت فصل قبلها فمعرفتش أبلغكم وشكرا جدا جدا لكل الناس الى سألت علىّ وخصوصا زميلى العزيز واحد الى شويه شويه كان هيأجر منادى يلف يدور علىّ:) مرسى قوى ياأحلى ناس فى الدنيا

فلنبدأ مش بس اللهجات هى الى ممكن تعمل سوء تفاهم بين الشعوب ده كمان الإشارات حركات اليد والوجه بيختلف معناها تماما وبتعمل مشاكل وأحيانا أزمات دبلماسيه

امثلا الإشاره ده

فى ألمانيا معناها يا أبله

فى فرنسا ترمز الى الصفر

فى اليابان تعنى قطع النقد المعدنيه

أما فى أمريكا فتعنى أن كل شىء على ما يرام أوكى

وفى أمريكا الاتينيه فتعنى اذهب الى الجحيم

والامر لا يقتصر في بعض الاحيان على سوء تفاهم يمكن تصحيحه، بل قد يؤدي الى ازمات دبلوماسية، ومن الامثلة المشهورة على ذلك ما حدث لينكسون عندما كان نائبا للرئيس ايزنهاور اثناء زيارته لدول امريكا اللاتينية، فقد حدث ان استعمل هذه الاشارة وقصد بها اوكي فزمجرت الجماهير غاضبة، حين شاهدت الاشارة، واحتلت صورة نيكسون صفحات الصحف الاولى في اليوم التالي تندد بإهانته لأمريكا لاتينية

احتجاب مؤقت

من فتره وشيماء صاحبة مدونة واحده من الناس والبساط السحري التي اشترك معها في كتابة بوستاتها ,من فتره لم تكتب بوستات جديده ولا بترد كمان علي تعليقات المدونين, علي خلاف ما اعتادت عليه حيث كانت بترد دايما, لا في مدونتها واحده من الناس ولا هذه المدونه التي اشارك معها فيها,بجد مش عارف ايه السبب ,اتمني تكون بخير وسلامه ,ومن ثم قررت عدم كتابة بوستات جديده الي حين عودة شيماء ,اتمني تكون بخير وترجع لمدوناتها وتمتعنا ببوستاتها الجميله ,ومن اليوم سيكون احتجاب مؤقت لحين عودتها بخير وسلامه ان شاء الله

دليل المغتربين لفهم لهجات السكان المحليين :الجزء الخامس

هذا الجزء كان مخصص لشيماء بيد ان شيماءيبدو لي مشغوله الايام دي ,من ثم فلا مناص من قيامي انا بكتابته معذرة شيماء.
النهارده هتكلم علي البطيخ وانا مكره مع اني بحبه جدا ,طيب ايه الحكايه بقي ,الحكايه أن بيتنا يوميا لا يخلو من البطيخ اهو بقي عيله في حالة عشق بينها وبين البطيخ علي الاقل بطيختين كل يوم لدرجة أصبحت العلاقه بيني وبين البطيخ سيئه جدا ومش طايق سيرته مع اني كنت بحبه ,بس تصدقوا مش بقدر استغني عنه فيه جاذبيه بنهار أمامه وخصوصا لما تكون متلجه كده
وطعمها يهبل ههههه ,بفضل أقاوم وأقاوم وفي الاخر بستسلم
طيب أيه حكاية البطيخ النهارده؟ الحكايه ياشباب هي ان البطيخ في كثير من الدول العربيه لا يسمي بطيخ , واحد كده دمه خفيف هيقولي امال ايه بيسموه باذنجان هههه, هقوله أصبر علي يا سيدي وانت تشوف
البطيخ في السعوديه بيسمي حبحب ,أما اذا كنت في تونس فسمه دلاع, التونسيه مدلعينه قوي ههه ,مش زيينا أسمه بطيخ حاجه كده تفزع,بس أهو أحسن من السوريين اللي بيسموه جبس هههههه
معلهش مقدرتش اخترلكم كام بطيخه أضعها علي البوست أصلي الجهاز عندي مش عارف اصابه ايه جائز صعبان عليه حالي الان فأعلن تضامنه معي ورفض وضع اي صوره للبطيخ,أتمني من شيماء تخترلي كام بطيخه كده وتحطهم فوق البوست بس يا ريت كده وهي بتشتريهم تتاكد من كونهم كويسين , يلا سلام

دليل المغتربين لفهم لهجات السكان المحليين :الجزء الرابع

لو أنت انسان ذو شنه ورنه كا يقولون ,ودعوت مجموعه من الاصدقاء لحفله او مجلس للتسامر ,وحضر الاصدقاء , وكلهم يمتكلون مواهب شتي في اللحن والطرب , وبما انك انسان حساس بلاش حساس دي هتعرفوا لييه انا قلت كده متستعجلوش,وبما انك انسان بتعشق كل ما هو جميل طلبت من صديق منهم أن يشنف أو يمتع اذنيك بلحنه وصوته طب وبعدين, بعد ما ابدع هذا الصديق طبيعي أن تشكره وتثني عليه بكلماتت تليق بفنه الجميل ,طيب أنت شكرته وأثنيت علي فنه المبدع يا تري ايه كان رد فعل هذا الصديق المبدع ,هذا الصديق رد عليك وقال لك كلمه في لهجتنا المصريه كلمه جميله معبره ولكن في لهجتك انت كلمه قبيحه وسيئه جدا تري ماذا سيكون رد فعلك؟
الحكايه بقي كما يروي الاستاذ الكبير محمود عوض في كتابه بالعربي الجريح, ان الاستاذ محمود عوض وعبد الحيلم حافظ والاستاذ عبد الوهاب وفريد الاطرش كانوا مدعويين الي قصر فخم يمتلكه رجل مغربي هذا الرجل يعشق الموسيقي والطرب وطلب من الاستاذ فريد الاطرش ان يغني وأبدع الاستاذ فريد كعادته وحينما انتهي من الغني ذهب اليه صاحب القصر وقال له ابدعت يا استاذ فريد فرد عليه الاستاذ فريد وقال له أبدا والله ده مجرد سموك حساس جدا , في تلك اللحظه الرجل أمتقع وجه وتغير 180 درجه ,الاستاذ محمود عوض تابع المشهد ونظر الي عبد الوهاب فوجده كاد أن يصبح تحت الكرسي فنظر الي حليم فتظاهر عبد الحليم بالانشغال مع شخص اخر ,في النهايه اتضح ان كلمة حساس في اللهجه المغربيه تعني شخص شااااذ